與Oscar相識十年突然撻着，江若琳獲生煎包王射住官司一齊孭
 
【東方日報專訊】與內地男星曹雲金甩拖半年的女星江若琳（Elanne），昨日和前組合Bliss成員兼「生煎包王」蕭潤邦（Oscar）在網上宣布由相識十年的朋友升呢戀人！Oscar更公開示愛：「在未來的日子，你嘅船係我，你嘅燈塔係我，連岸亦都會係我！」對於Elanne近年負擔過百萬的龐大律師費，坐擁五間生煎包店、一間西餐廳的Oscar，自言是對方的「大燈柱」照起對方：「有仗要打，就一齊打！」
現年29歲的女星江若琳（Elanne）於去年9月生日，宣布與內地男星曹雲金分手，昨日她突然在網上宣布，與前組合Bliss成員、坐擁六間食肆的蕭潤邦（Oscar）撻着，由十年的朋友關係昇華至戀人！兩人更不約而同在社交網上載在旺角街頭挨到實的甜蜜背影，Oscar更引用Elanne新歌《小燈塔》冧爆示愛：「在未來的日子，你嘅船係我，你嘅燈塔係我，連岸亦都會係我！」
雖然Oscar去年曾表示有一名拍拖多年的空姐女友，並計劃拉埋天窗兼置業，但最終覓得真命天女卻是Elanne。Elanne亦隨即發表愛的宣言：「對的，我找到了，一個懂我、愛我的人，在未來的日子裏，一如10年來的不離不棄，更多的是，我們會帶着多一個人的支持、多一個人的力量繼續努力。」
否認有餡
身在內地拍戲的Elanne接受本報電話訪問，問到發文中提及「多一個人」惹來有孕疑雲，她急澄清：「大家唔好諗多咗！呢件係希望同大家開心share嘅一件事，望大家可以畀多啲空間我哋！」而Elanne的經理人Cero亦補充，否認兩人好事近，Cero說：「Elanne唔鍾意收收埋埋，未到結婚階段。（Elanne視男方為結婚對象？）佢每次拍拖都好認真，希望開花結果，將來嘅嘢冇人知。」
至於忙為大埔新店張羅的Oscar，昨日身在深圳購買廚具，接受本報訪問時亦否認Elanne有B，他說：「撞鬼咩！其實佢意思係話多咗我咋！為免有一日畀人見到我哋拖手咁奇怪，咪（公開）囉！佢係一個好孝順嘅女仔，開口埋口都講屋企人。」
自嘲「大燈柱」
Elanne自2014年開始與前公司打官司，為應付過百萬以上的龐大律師費，不時中港兩邊走撲水，她曾揚言每月要有六位數以上收入，才可應付官司費用及生活費。對於Elanne的重擔，Oscar則man爆表示是對方的「大燈柱」，擺明「射」住女友：「我同佢一樣都係一個人撐起頭家，之前我面對困難，佢依家都要面對好多嘢，有場仗要打，就一齊打！（支援佢？）我哋會一齊面對，我都試過冇錢，由零開始。」正準備開第六間分店的Oscar，據知還打算今年內於荃灣及北區再開兩間分店，拓展飲食王國的版圖。 |
發表於 2017-5-1 10:15 PM
| 
