[股票經營] 小孩講股：08/05/07 港股整固後有條件再上

笨小孩

一如所料，今日個市獲利回吐，架妹高潮過後，港股開市已經偏軟，一早話班地產佬信唔過，o趙完就鬆人，次次都係咁，每次都借賣地消息出貨，佢地d衰野數幾日都數唔晒！

祖國黃金周後復市，成班“基民”好似餓鬼搶屎咁，將內地股市再推向癲峰，阿爺都唔知搞乜，宏調就調港股，內地反而日日“高高高”，係唔係真係咁勁呀？而美國果邊今晚終於回軟，連升五日，五日都新高點都要抖下，睇黎港股都要繼續回一回，整固一下，但要有心理準備，隨時整固完再上，因為下面暫時最多兩三百點水位，若企番20700左右，有條件再爆上。其實好多隻股已經好值得入，可惜好股太多，錢太少…

近排新股表現非常差，1886、1883、606、2007、3993、998，日跌夜跌，都唔知搞乜，唔好話抽新股冇風險，抽中唔走，或者上市後追貨隨時坐艇！最佳例子係見高即沉板(1888)，上市後最高見9.93接近10蚊，此股當時仲大獲好評，多位股評人話11蚊冇走雞，點知股如其名，見高即沉，一浪低於一浪，反彈完再沉底，仲穿埋招股價，真係俾佢吹漲，最慘係1888 IPO每人有一手，“一人有一手建滔”，再加上之後追貨者，大跌後摶反彈者，艇民數之不盡…呢兩日1888終於從低位反彈，上破50天線及招股價。呢隻見高即沉板，見低必反彈，好多人中招，但其實1888業積唔錯，去年純利增52%，現價PE僅13倍，走勢點可能咁差！

今日又有一隻IPO招股，叫佳華百貨(602)，主要係深圳東莞百貨公司，有內衰股概念，唔好似為內衰股一定好，呢行競爭都好大，一手得2千幾蚊，計過數，佢上市首日升得幾多？就算升都冇乜肉食，反而跌可能走唔甩，抽又未必實抽中，都係咪搞，斷估佢唔會好似英皇證券咁升成倍呱？留一留力，等下明天可能百般美麗！


免責聲明：本文純為小孩無聊之作，若對閣下造成任何投資上的損失，實屬不幸！

[ Last edited by 笨小孩 on 2007-5-8 at 11:45 PM ]

Aivn

無錯...依家好多都入得過
就係錢太少...

'nice'

1888真係印象深刻,本來我都中一手,起9個幾放左,賺2千幾,以為走得好醒,
之後起$8.5再入,不過就勁跌,終於起$7.3止蝕,蝕到凸!!

係囉,最近D新股都無驚醒的,除左3隻的表現凸出,其餘都乏力,
前景有所保留,希望在一個好價清一清貨,抖一抖!!