本帖最後由 tlkwan 於 2011-8-31 06:43 PM 編輯
剛經歷百年慘敗嘅阿仙奴終於醒覺，領隊雲格「轉性」搵老將救亡，已同意簽下南韓前鋒朴主永、巴西左閘安德里山度士及德國中堅梅迪薩卡，但其他目標竟然係「車底橙」，包括馬隆達、班拿約及阿歷士洛里高等三位不受車路士領隊保亞斯重用球員，其中前者將近成事，雲格呢鋪真係向車仔認低威咯！
阿仙奴上仗聯賽以二比八慘敗喺曼聯腳下，過百年來首次一場失八球，防線猶如紙紮，領隊雲格向現實低頭，不但大破慳囊準備用3,220萬鎊（約4.1億港元）增兵，而且放棄以往青春班路線。將以620萬鎊（約7,900萬港元）加盟嘅費倫巴治左閘安德里山度士已二十八歲，身價800萬鎊（約1億港元）嘅雲達不來梅中堅梅迪薩卡二十六歲已算年輕，其他目標阿歷士洛里高現年二十九歲，至於馬隆達及班拿約更年屆三十一歲。
事實上，阿仙奴最大死穴係球員太幼嫩，特別係防線人腳質素參差，如果改由安德里山度士、阿歷士洛里高及梅迪薩卡鎮守後防，問題應可大為改善。據聞雲格手上約有9,000萬鎊（約11.5億港元）資金，會用1,800萬鎊（約2.3億港元）打包馬隆達、班拿約及阿歷士洛里高，三人都唔受車仔新帥保亞斯重用，兵工廠得手機會甚高。而車仔想用班拿約加800萬鎊買利物浦中場魯爾梅利斯，但已被紅軍拒絕。
另外，雲格亦睇中加利卡希爾，但保頓要求1,600萬鎊轉會費，令阿仙奴卻步。原効力摩納哥嘅南韓前鋒朴主永已正式加盟兵工廠。
阿仙奴購物籃
球員 年齡 位置 轉會費
梅迪薩卡 26 後衞 800萬鎊
安德里山度士 28 後衞 620萬鎊
朴主永 26 前鋒 300萬鎊
馬隆達 31 中場 800萬鎊
阿歷士洛里高 29 後衞 700萬鎊
班拿約 31 中場 300萬鎊
註：朴主永、梅迪薩卡及安德里山度士已落實 | 
發表於 2011-8-29 11:40 AM
| 
