[旅遊區] 我的韓國之旅

alanfcw

同女朋友去咗韓國返嚟成個月，終於可以寫返五日嘅行程俾大家分享吓！

第一天--

我哋搭6/12號淩晨機，所以5號放工先去機場，同女朋友食咗味千，之後就同領隊滙合，攞咗最後嘅行程，攞行李過磅，十一點左右就入閘啦！過保安時，金屬探測器嘟嘟聲，原來衰咗係條皮帶上，好彩冇事。之後等咗一陣，差唔多十二點就上機啦！我地坐窗口位，不過搭夜機冇嘢好睇！飛機順利起飛後，我就開始瞓，不過女朋友話瞓唔到，所以睇電視，竟然有味分高下喎！瞓到兩點半，有飛機餐食，我食牛肉飯，女友食魚肉加薯蓉，食完又瞓過，女友繼續睇電視，到四點半到預備降落啦，起身扣好安全帶，之後四點九到安全降落！（之後會轉用韓國時間，快香港一個鐘）出閘攞行李，排隊唱錢，唱咗港幣四千蚊，變咗四十幾萬WON，突然覺得自己好有錢呀！之後團友集合，總共十七人，介紹韓國導遊，仲有攝影師，跟住領隊話六點半先上旅遊巴，可以係機場自由活動，我同女友就週圍行咗一陣，買咗樽水飲，跟住坐到夠鐘就集合上旅遊巴啦！一出機場，真係好涷，高速跑上旅遊巴，上到旅遊巴，導遊簡單介紹咗一下五日嘅行程，之後就俾團友瞓啦！九點鐘，到達行程第一站--「戰爭紀念館」，落車又係覺得好涷，不過冇落雪。戰爭紀念館歷史就唔寫啦，主要影咗啲坦克、飛機嘅相，無咩特別，之後去「韓屋村」主要睇古時韓國人住嘅屋，生活文化咁，係韓屋村入口旁買咗啲紅豆魚食，係一種魚嘅形狀，入面係紅豆蓉餡，一千WON三條，食完真係暖粒粒。跟住去「仁寺洞」，其實係一條街，導遊話主要買啲手工藝品，茶葉咁啦，我地係度買咗糯米磁，全條街唔係好長，行咗半個鐘就完啦！之後就午餐時間，係食人蔘雞，好正，雖然條蔘好細條，不過係真嘢，飲埋杯人蔘酒，真係成個人暖哂！食完午餐就shopping啦，目的地係韓國最大地下商場「COEX MALL」，商場真係好大，不過有好多coffee shop，而啲鋪頭就同香港啲差唔多，唯一特別係有個水族館，有條海底隧道可以睇鯊魚同其他熱帶魚，不過我同女友就掛住行街，無時間參觀，行咗兩個鐘，之後行去「SEVEN LUCK」賭場，呢個賭場只係俾遊客入內，所以唔係好多人，我同女友玩大細贏咗九萬幾WON，LUCKY！去完賭場，之後終於搭車去酒店啦！去到酒店，分完門匙後，問咗附近有咩好食（第一晚係自費晚餐），即刻上房，第一時間係刷牙，之後就落街食飯啦！我地揀咗食中餐，食咗蝦仁炒飯，牛肉麵，仲有水餃，都係一萬六千WON到，食完就返酒店，沖完涼，執埋第二日去滑雪同浸溫泉要用嘅嘢之後，就瞓啦（時間係八點，除咗病，真係未試過咁早瞓）！講返間酒店，連續住兩晚，設施OK，都乾淨企理，唔係太差，不過張床太軟，有啲唔慣咁。


第二天--

一早六點俾女友叫醒，原來出面落雪呀，不過真係好累，係咁咦望咗兩眼就繼續瞓，七點再起身，已經停咗雪啦！梳洗完後，大堂集合，搭車去食咗個中式早餐，主要食粥，仲有啲烚蛋，炒芽菜咁，食完就搭車去滑雪啦！滑雪場叫「芝山滑雪場」，我地係門口啲鋪頭租咗滑雪衫褲，之後就入場租埋啲滑雪工具，跟住就由導課教我地滑雪啦！過程唔寫咁多啦，不過滑雪真係好好玩，當然成日跌低，不過都試過成功停係度嘅！午餐係滑雪場食漢堡飽，滑到四點就起程去浸溫泉。去到「利川SPA PLUS」已經五點啦，呢個溫泉全裸區有分男女，亦有室內外之分，換完衫，要先經全裸嘅溫泉區，之後再去可以著衫嘅溫泉區。浸室外溫泉時，上水嗰吓真係好涷，而室內就有幾個特別味道嘅溫泉，好似檸檬同埋啲草藥味，浸到六點半就上水預備走，七點齊人門口集合，行去對面食韓式牛肉燒烤，導遊話韓國啲燒烤同香港唔同，多數得一種肉俾你燒，牛肉同飯可以任加，有生菜可以包住啲牛肉食，仲有個海帶湯好好飲，仲可以解熱氣添。食完返到酒店都係九點幾，所以我地冇瞓，問導遊寫咗個韓國地址，約埋團友一共十二人，搭的士去「東大門」。韓國嘅的士有白、藍、黑三隻色，白色同藍色係一樣，而黑色係遊客的士，貴啲喎！我地搭白的，的士入面有衛星導航，俾個地址司機睇，之後半個鐘就到啦！由於好塞車，所以我地係對面線落車，之後穿過六條行車線行返去對面，我地主要行三個商場--「DOTTA」、「HELLO APM」、「MILOGUE」，三個商場都係八、九層高，每層都買唔同嘅嘢：男、女裝，運動、生活用品咁。我同女友就冇咩收獲，不過都行到一點先搭的士返酒店瞓，而我地啲團友好似行到兩、三點先返。搭的士返嚟嘅時候，啱啱上咗的士，就有個韓國青年向我地揮手，可能想搭泥鯭的掛，不過我地冇理佢，叫司機開車。

第三天--

搬齊行李離開酒店，然後就去一間類似員工飯堂嘅地方食自助早餐，環境麻麻，不過啲嘢食都可以接受，款式都算多。食完就向「青瓦臺」進發，青瓦臺係韓國總統工作的地方，我地梗係唔可以入去啦，所以呢度無嘢好行，淨係有一間賣紀念品嘅鋪頭，同一個大鼓俾人影相。之後去咗「景褔宮」同係附近嘅「國立民俗博物館」，自問唔係一個好學生，無咩聽導遊講歷史，淨係識影相，不過由景褔宮行去國立民俗博物館條路好泥濘，行到條褲腳污漕哂。下一站係「KIMCHI SCHOOL」，嚟呢度，梗係學整泡菜啦！整泡菜最難係啲醬料，不過醬料已經預備好，我地淨係將啲醬料搽係啲菜度，然後包好佢，過程十分簡單。整完泡菜，就出咗去著韓國服飾影相，我個套衫係侍衛裝，女友嗰套就唔知啦！由於時間緊迫，所以好快影完就去咗新村食傳統韓國鐵板燒雞，食完就行「新村梨花女子大學購物大道」，嚟到呢到，團友們第一大目標就係EVISU專門店啦，其次就係FACE SHOP、SKIN FOOD咁啦！大家都收獲豐富！之後去「梨泰院」，去咗一間一邊賣EVISU，另一邊就賣LANIEGE嘅鋪頭，女朋友都睇啱咗一條牛仔裙，不過唔啱SIZE，所以無買到。跟住就嚟到今日最後一站，「明洞/南大門」，導遊先帶我哋去食一呎長嘅雪糕，之後就自由活動，呢到有齊四大化粧牌子，除咗之前提過啱嗰三間之外，仲有MISSHA，女友就大出血，不過係呢度買嘢，真係有好多贈品送。總給全個下畫都係SHOPPING為主，唔好問我呢幾個地方有咩特別呀，最特別係個銀包會縮水囉。之後去食咗個好普通嘅晚餐，跟住就返酒店啦！呢間酒店，同頭兩晚住個間係同一隻團，不過質素就差好遠啦！我哋間房要換咗兩次KEY先開到，團友間房仲有好多蚊係浴室，搞到要換房。房入面唔知點解有三張床，搞到間房好迫咁，而且隨處可見修補過嘅痕跡，亦都無電熱水壺，要飲熱水就要行出走廊揾水機，好彩住一晚咋。

第四天--

起身上酒店樓上食西式自助早餐，之後去咗「人蔘專賣聽」、「化粧品城」，都係SELL你買嘢咁啦，我哋都有小小幫襯。跟住就去咗零食啦，入面好多人，仲有其他團嘅團友，都係買啲例牌嘢，紫菜、雞泡魚乾、魷魚絲、米通咁啦！午餐食石頭飯，好食過香港好多，跟住就搭個幾鐘頭車去「夢幻樂園」啦！先去酒店CHECK IN，我哋住北歐式小木屋，房好正，有露台可以望到樂園入面，要鋪床墊瞓地下。擺好行李就行去夢幻樂園啦！先去睇野生動物，排咗好耐隊呀，不過都抵，啲熊好得意呀，識行同擺POSE，不過啲獅子、老虎就睇唔清楚啦！出返嚟之後，沿路行去搭吊車都見到企鵝、海獅，搭吊車上山，團友玩咗個好刺激嘅機動遊戲，我就無玩啦，同女友去咗搭摩天輪，上到頂望番落嚟，真係好靚呀，跟住去玩碰碰車，好耐無玩啦，排咗半個鐘頭，一開車就同女友玩互撞，其他人又撞埋嚟，總之就撞嚟撞去啦！玩完就趕落山睇煙花同激光SHOW，唔識形容，一個字—正，好過迪士尼好多。跟住食漢堡飽做晚餐，無計，睇完煙花都七點幾，好多食肆都收七點！點知食食吓突然熄燈，全店黑哂，原來係開始花車巡遊，即刻食完就跑出去睇。不過感覺就一般，可能係唔識啲卡通人物掛，而且啲花車太光啦，好刺眼。最後睇埋3D動感影院，跟住就行返酒店啦！呢度有啲奇怪，我哋總共十個人，樂園就熄哂燈，係度行嚟行去都無人理我哋，就算有職員擦身而過都無理，我哋都諗如果盪失路都唔知點算。返到酒店後沖完涼後，去咗其中一對團友間房玩UNO，渡過咗一個爆笑瘋狂嘅晚上。

第五天--

朝早行咗去樂園入面嘅餐聽食早餐，之後搭車去「清溪川韓流館」，韓流館其實係一個旅遊咨詢中心，無嘢睇，有啲紙板明星俾你影相，而清溪川應該夜晚會靚啲，我哋一大早去，啲燈熄無開。之後去「護肝寶專門店」、「水晶城」，可惜彈葯已盡，所以無幫襯。最後就去機場啦！入咗禁區食咗個午餐，好貴呀，啲平嘅麵餐賣哂，唯有食啲萬五WON嘅貴餐啦！好彩算好食。上飛機又有餐食，今次食雞肉飯，女友食牛肉加薯蓉，由於搭兩點機，所以無瞓，睇電視，嘅然有變形金剛睇，啱啱好睇完就落機啦！攞完行李，同團友道別後就搭巴士返屋企啦！

yeung hiu he

樓主, 講真只看文字對我來說有點辛苦,
如果你可以加少少你在韓國的相,
我想我會看得有興趣一點!

alanfcw

貼d相先