華立茶餐廳

win715

下午 3 點 3，大家會諗起啲咩呢?

係，就係下午茶。


我平時返工就好少下午茶，不過星期六﹑日就一定 Tea 一 Tea 嘅。

點解? 因為我鍾意放假訓到黃朝白晏。

Miss 早餐，Miss Lunch 就當然食 Tea 啦。

我會帶大家去邊到 Tea 呢，就係我地平時去開嘅華立茶餐廳。

內部

呢間茶記係大埔都開咗一段長時間，點都有10 幾年嘅。

佢都叫做舊式茶記，因為舊式茶記先會自己整包包同蛋撻。

佢地好多都係做街坊生意，啲伙計同啲街坊都打成一片。


                                               擺設


佢地有裝電視，好多街坊一坐就成個鍾，所以成日都好 full 0家。

我最愛就係佢地嘅波蘿包同奶茶。

佢地嘅奶茶，茶底都幾濃，可能用黑白牌淡奶嘅原因，成杯奶茶又香又滑又濃。


                                          奶茶

無論咩包包，上枱前一定會整熱佢。


                                         波羅包

一個熱辣辣嘅包包，一杯香濃奶茶，呢個咪就係港式下午茶囉。


                                    港人的3點3

是日my friend 叫咗個特餐 - 火鴨絲炆米。


                                     火鴨絲炆米

份量都 OK 多0家，仲有例湯同餐飲，大件夾抵食。


                                                是日例湯


                               特餐F - 火鴨絲炆米 - $31

華立同一般茶記一樣嘅，咩都有得食。

除咗特餐，仲有午餐﹑快餐﹑下午茶餐﹑粥粉麵飯都有，仲有布拉腸粉食。

一個特餐 $31，波蘿包加奶茶 $15，total 都只不過係 $46，每人 $23，超值!



華立茶餐廳檔案：

地部：大埔寶鄉街48號地下

電話：2656 8788

My 食評：

環境：8分 (去茶記就要預咗唔會好靚，不過都 OK 嘅)

味道：9分 (淨係食個波蘿包都抵)

價錢：9分 (一個午餐最多都係 $40，抵食啦)

方便度：9分 (係大埔舊街市附近，一啲都唔難搵)

後話：

我同 friends 幾乎每個星期都會去華立一次，入面啲伙計都認得我啦。

記得有一次，我一坐低，個伙計哥哥仔就同我講雞尾包無哂，叫我食其他。

呢啲咪叫做「人情味」囉，亦都係我鍾意去茶記嘅原因。