娛樂滿紛 26FUN - Powered by Discuz! Board

標題: 香港五大鬼故主持，Grandfather 聽開邊個? [打印本頁]

作者: 電騙男 時間: 2017-9-4 04:00 PM 標題: 香港五大鬼故主持，Grandfather 聽開邊個?

又驚又想聽

鬼故最吸引人嘅地方就係令你越驚就越想聽，同時好彩亦有一班人好鍾意分享靈異故事。趁著鬼節同大家分享下香港一班專業分享鬼故嘅主持人，等大家可以聽吓故仔應一應節啦！

潘紹聰
一向鍾意聽靈異故事嘅聽眾應該對外號「鬼王」嘅潘紹聰唔陌生，佢係少數成功喺網上爆紅、點擊率驚人，甚至可以成功賺取利潤嘅網上電台《恐佈在綫》主持人。據說雖然佢自己冇陰陽眼，不過多年來一直受惡鬼纏身。首先就有紅衣女鬼相隨、「畀鬼壓」已經係濕濕碎、去靈探都會被惡鬼襲擊。
潘紹聰到而家主持靈異節目超過十年，每日都接觸各式各樣嘅鬼故。自佢開始主持《恐怖熱線》以來，每日都同「鬼」打交道，當然袋住唔少「貨」啦！上年連ViuTV就邀請佢主持《晚吹 - 總有一隻喺左近》，喺今年繼續搵佢主持《晚吹 - 總有一瓣喺左近》，同觀眾分享嚇破膽嘅鬼故！

雷宇揚
要講到香港電影史上最長壽同最出名嘅靈異系列都可以話非《陰陽路》莫屬，而做足一至九集主角嘅雷宇揚同羅蘭姐、古天樂可以話係電影嘅中流砥柱。由於電影涉及香港本土各行各業，內容貼地，令好多香港人印象深刻，代入感更強。其實起初雷宇揚藝員訓練班畢業，之後只係喺綜藝節目做下主持或者電視劇配角。直到後來加入電台主持靈異節目，風格夠晒恐怖，同潘紹聰一樣都係靠「鬼」搵食。不過而家雷宇揚長居於廣州，同內地女主播老婆馬荔結婚，前幾年仲榮升爹哋添！

梁思浩
香港有唔少節目講鬼故，不過就無咩電視節目會親自闖入猛鬼地親身拍攝。而有線娛樂台嘅王牌節目《怪談》就為呢一類節目開先河，攝製隊會親自去唔同地方嘅凶宅探靈、甚至去撩鬼，希望為觀眾證實靈界嘅存在。雖然節目前兩年已經被「永久停止」，不過已經主持咗呢個節目12年嘅梁思浩曾經去過富士山猛鬼酒店留宿、亦曾經去過唔少東南亞國家採訪奇人異士、甚至以身試降，可謂身經百戰。《怪談》除咗喺東南亞地區受歡迎之外，連內地觀眾亦十分受落，仲封佢為「香港靈幻一哥」。雖然《怪談》已經停播，不過之後佢亦有參與拍攝靈異節目《我們都是這樣撞鬼的》。

路芙
路芙當年經「鬼王」雷宇揚介紹入行，起初任職唱片公司宣傳人員同有線電視 VJ。雖然佢曾經參與過唔少電影拍攝，好似《完美情人》、《七月十三之龍婆》、《恐怖熱線之大頭怪嬰》等。不過佢嘅重頭戲當然就係佢主持嘅靈異電台節目《娛樂旗艦店之恐怖日線》同長壽靈異節目《恐怖熱線》。而佢同其他主持不同之處就係由於佢係基督徒，所以佢對鬼怪有另一番見解，唔會一味迷信。可惜早前新城裁員，路芙亦隨潮離開咗。不過佢亦喺網上開咗個Channel同大家繼續分享靈異經歷，各位粉絲唔使失望啦！

雲海
作為靈異愛好者，雲海經常周遊列國，收集各地嘅鬼怪故事。除此之外，佢亦對UFO不明飛行物體有好深入嘅研究。唔講唔知，原來佢曾經做過社會福利員同有線電視《怪談》主持、更曾勇闖 UFO聖地 Area51及羅茲威爾、去過70個國家及中國20個省及自治區。2000年就開始寫靈異小說，有《凶宅魅驚》、《不死劫》、《 X檔案之旅》系列等著作。不過講到最受歡迎就當然係佢嘅電台節目啦，例如：《摩星嶺4號》、《談談靈說說怪》、尤其同DJ Donald一齊主持嘅《叱咤搞靈異》就特別受歡迎，可惜最後有傳因為商台剪咗佢《摩星嶺4號》入面數十分鐘嘅內容，而令到二人反目，雲海亦隨即離開商台。之後，雲海亦不定期喺網上上載自資錄製節目《格羅茲尼》。

各位靈異愛好者，你覺得邊位靈異節目主持人講鬼故最有Feel呢？

圖片附件: 5d7dfd0de98f81eb3133b849ba51c798.jpg (2017-9-4 04:00 PM, 91.5 KB) / 下載次數 0
http://www.26fun.com/bbs/attachment.php?aid=2878728&k=7830a40044e7ace5cc539eb0fb084913&t=1714355218&sid=Kf5KdM

作者: 電騙男 時間: 2017-9-4 04:02 PM

可惜早前新城裁員，路芙亦隨潮離開咗

炒魷

作者: ThomasKoon 時間: 2017-9-4 05:00 PM

雲海+路芙，其次係潘紹聰

作者: 自拍男 時間: 2017-9-4 09:16 PM

雲海+路芙，其次係潘紹聰
ThomasKoon 發表於 2017-9-4 05:00 PM

80年代聽雷宇揚

歡迎光臨娛樂滿紛 26FUN (http://www.26fun.com/bbs/)