秋葉林

我覺得呢，唔係話癩蛤蟆唔食得天鵝肉，不過就唔係話隻隻癩蛤蟆都食得落囉，我自己就曾經係一隻試過食天鵝肉嘅癩蛤蟆。

我呢都算係一個比較有內涵﹙即係外表唔係咁吸引﹚嘅人，曾經就有過一個幾靚嘅女朋友﹙有啲似女生宿舍嘅 Macy﹚。佢係一個好活潑同熱情嘅女仔，而且都幾 in 幾鐘意打扮，班 friend 成日都話我今鋪真係一次過用晒祖先績落嚟嘅福蔭。

可惜我偏偏係果啲無乜自信嘅人﹙無計啦，自己係癩蛤蟆嘛﹚，所以同佢拍拖咁耐就擔心足咁耐，見佢成日著小背心、熱褲就硬係周身唔自在﹙男人係咁衰，未係自己女友果陣就好鬼鍾意見到佢著成錦，做咗自己條女就 ......﹚；佢又天生好 social 好 active，所以好多人﹙包括啲條件唔錯嘅男仔﹚成日响佢身邊係咁轉。

同佢拍咗半年，講真兩個人果陣、又或者拖住佢出嚟見班 friend 真係幾好 feel。當然我唔係純粹為咗威先同佢一齊，佢真係一個好好嘅女仔，我都不知幾咁鍾意佢﹙我估佢都應該係，不過佢無講過鍾意我啲乜﹚，但係去到最尾我都係主動提出要同佢分手。

我哋分手並唔係因為嗌交或者係第三者，只係我覺得同佢一齊真係好大壓力。個人成日胡思亂想但係又唔可以同佢講﹙俾佢知實聽嗌交﹚，同啲 friend 呻佢哋又話你晒命，真係好辛苦而唔係幸福。

所以話呢，食天鵝肉嘅癩蛤蟆唔係個個都得，食得鹹魚要抵得渴，想要食天鵝肉之前，癩蛤蟆們真係要做好心理準備。當然只係諗住拍散拖嘅咪試下囉，不過我自己就接受唔到喇。