英超獨霸歐聯是否好事？

eric911

歐聯四強戰英超玩晒﹗估不到少了近半隊主力的曼聯可入7球，合共7比1狂勝羅馬。今場羅馬的表現其實不至於太差，只是曼聯的爭勝決心超強，一開波已搶錢咁搶，令羅馬後防亂晒籠。卡域克和費查表現亦出奇地好，尤以前者更入了兩球世界波，軒斯亦踢得非常搶鏡。其實，甚麼巴塞、皇馬主場亦不算甚麼，奧脫褔才是真正的地獄球場，那種氣氛簡直可用處處迫人來形容，就連托廸的表現也一般。至於車仔那場就有點奇怪，當車仔下半場追成1比1平手時，兩隊也好像不願踢那樣，尤以華倫西亞，成隊慢晒落黎，反觀車仔還好一點，叫做有點攻勢，臨尾10分鐘重好似自己喺主場咁攻，最後在補時艾辛離門20多碼遠射死位成2比1，無仇報激死華倫。明日凌晨利物浦亦好大機會入四強，就變成四強有3隊英超出現，應該是歐聯歷史以來首次出現此情況，唔怪得歐協阿頭柏天尼狂叫改歐聯出場制度，即是英、意、西、德國聯賽的歐聯名額由4變3，免出現現時的獨攬情況之餘，亦可顧及次一級的球隊參加歐聯的機會。本人亦是英超死硬派，但想深一點，雖說勝者為王，但同一國家的大球會獨霸歐聯，會否令球迷失去觀賞的意欲？今屆以後，是否又是這幾隊玩盡歐聯？除著英超球會愈來愈富有，一眾外援超級球星的來投，絕對可令英超球會雄霸一方，英超迷當然歡天喜地。但另一方面，亦意味住本土球員少了出場機會，形成英格蘭國家隊的低劣表現。環顧意、西、德國球會，當然亦有一級球星助陣，但相比英超球會的外援量，已少了很多，本土球員亦有出頭機會。英超球隊在世界上取得成績，固然是有名有利，亦助英超聯的地位高高在上，贊助商金額自然滾滾而來。而國家隊有好成績，亦直接影嚮到整個國家形象，甚至是政治舞台上的影嚮力。所謂「針無兩頭利」，未來的日子，英足總如何取捨？