terencey

作為一個捧咗利物浦接近 20 年嘅 fan 黎講, 一直都好希望見到利物浦自杜格利殊時代之後, 再一次高舉頂級聯賽冠軍獎盃. 可是由桑拿士嘅世紀浩劫, 伊雲斯既攻強守弱同侯利亞嘅矯枉過正, 不知令多少利物浦球迷傷心失望, 令人感到重拾勁旅本色, 爭奪聯賽冠軍嘅指望變得遙遙無期! 直至賓尼迪斯上任, 執教首季以有限兵源, 經典地奪得久違嘅歐聯冠軍開始, 令我對球隊未來再次滿懷憧憬!

我相信賓尼迪斯能帶領利物浦取得聯賽冠軍, 但未必會係今季. 雖然今季不再 "出閘脫腳", 球隊打出氣勢, 攻勢亦開始比以往流暢. 若非球証枉判十二碼, 被車仔僥倖迫和 1 比 1 , 否則已經開季 4 戰全勝. 加上現時利物浦係自 2002 年以來再嘗榜首滋味, 當然開心. 但係, 聯賽係漫長既, 實際d諗, 現時首要任務係要延續呢股氣勢同流暢嘅攻勢, 尤其作客嘅表現必需比以往穩定, 以便進一步縮窄與曼聯同車仔之間嘅差距. 另外,  現時只有艾加, 加歷查同希比亞三個中堅, 艾比路亞都可以打中堅, 但佢似乎打兩閘最合適, 而柏列達又賣咗去小保加. 所以球隊需要再引入中堅, 最好可以兼任閘位, 以免有傷兵時導致防線兵源緊張, 影響球隊成績. 此外, 我覺得需要買左翼, 除左列圖 (Leto) 之外, 再無可供調動嘅正宗左翼; 同埋前鋒嘅打握力都仲要改善吓, 例如古治咁.

我覺得今季開始會見到輪流上陣政策既作用, 可望日後好似賓尼迪斯帶華倫西亞咁, 用輪流上陣政策下在聯賽同歐洲賽都取得成功. 所以今季我都係睇好曼聯同車仔, 雖然佢哋開季不順, 令聯賽形勢緊湊咗, 但相信好快會進入狀態, 特別是曼聯, 佢哋既後勁係好强嘅. 因此我期望利物浦下季會更有機會問鼎聯賽冠軍.

[ Last edited by terencey on 2007-9-4 at 04:11 PM ]